Poslovne vesti - Makedonija

Завршена третина од делницата, досега инвестирани 46 милиони евра

Третина од градежните активности на автопатската делница од Демир Капија до Смоквица се веќе завршени и веќе се инвестирани 46 милиони евра.

Ова го изјави премиерот Никола Груевски кој придружуван од министерот за транспорт и врски Миле Јанакиески и директорот на Агенцијата за државни патишта, Љупчо Георгиевски во саботата се запозна со текот на градежните активности на делницата долга 28 километри.

- Активностите се одвиваат според утврдената динамика и изградбата на новата автопатска делница на Коридорот 10 ќе заврши за две години. Досега се пробиени 95%од трасата, значаен дел е веќе тампониран, а мал дел веќе и се асфалтира. Почнува работењето и на мостовите, со што околу една третина од работите се веќе извршени - изјави Груевски.

Во разговор со ангажираните работници на терен од изведувачот - грчката компанија Актор", Груевски посочи дека се информирал оти не се соочуваат со некои непредвидени проблеми од поголем карактер.

- Нема доцнења и задоволни сме од тоа како тече работата, а можам да кажам дека и ние како Влада сме задоволни, бидејќи работите досега одат согласно планираното и автопатот треба да биде завршен до 2016 година - изјави Груевски. Оваа делница е планирана да чини 210 милиони евра.